師奶唔易做。
師奶，看起微不足道的職位，其實好難做呀。
由行入一間超市開始，就係一次大作戰。係去超市的途中，已經要諗好來緊呢星期大概要食ｄ么野，營養配搭足唔足夠、蔬菜水果既份量足唔足、仲有天寒地凍唔好買生冷野食啦，咁要ｄ么野代替？
諗好哂，入到超級市場又可以有變數，今日橙特價，買多２個先。香蕉買唔買好呢??蘋果唔鍾意食,唔要!本來打算買三文魚但冇特價，咁唯有下次啦。其間還要兼顧成本、、營養、飲食喜好、菜式多元化、烹煮既時間和難度等等。拆掂條數之後，又要接受魔鬼既考驗，明明不喜歡吃甜食，但經過餅乾曲奇那一行時，我覺得ｄ曲奇同我招手，叫我帶佢地返屋企，呢個時候就要自己同自己講：「嗱嗱嗱,你係唔鐘意食甜野架。你睇下一大盒曲奇,幾多卡路里呀!仲有呀,記唔記得Law of Diminishing Marginal Return 呀?一樣野consume 得越多,佢帶俾你Marginal Benefit越少。心魔而已,你只會覺得第一塊曲奇好味,其他既好快會食到厭,到時放得耐又唔新鮮。走啦,仲望!」
同樣既考驗,係雪糕櫃同朱古力架面前又出現,千辛萬苦先行到收銀處埋單。如果當日買左雞蛋,回家既途中要打起十二分精神,因為打爛隻蛋就唔係落樓買番盒咁簡單。
返到屋企又要開始計數,煮飯最花時間,所以要先煮,方便睇火。豬扒明天食但今日要dup骨同醃左先,洗手準備切薑蔥。為免煮到一半肚餓頂唔順,先整個簡單既火腿三文治醫下肚先。
準備好明天的煮食材料,就到開始煩今晚果餐。最省事而又有營養的便當就是粥。打開雪櫃,把已經吃了三天的最後一份雞湯取出來,加入剛煮好的米飯,再切一些白菜,就任由它在火上煮著。手呢,還不能閒下來,因為要開始洗砧板、牛油刀、菜刀,清理桌面,幾多次我都係心入面問自己:「我可唔可以中場休息下呀?」
好彩既,整個作戰過程需時三個鐘(買煮洗),睇住一大煲唔知要食足兩餐定三餐既雞粥,我仲要係心入面感激萬分,因為終於有得停低手休息。通常煮完,都會冇哂胃口,但為免凍左仲難食,快快手刨埋佢。
日復一日既三餐溫飽,令我對所謂既甜蜜二人世界毫無幻想,間中煮下飯仔確係好甜蜜,但日日來?少半點愛都支撐不住。第時揀男朋友,我唔洗你煮心形牛扒,你得閒幫我洗多2 隻碗我已經好感動。
